Column: Klap van de mölle

Wiej mut de klimaatdoelen halen. Leu, wiej mut de klimaatdoelen halen. Dus mu’w windmöllen potten. Idioot grote windmöllen. Wo grötter wo better. En ’n oetstoot mut umlege. Want wiej mut de klimaatdoelen halen. En al dee leu dee bezwoar hebt, dee hebt et neet begreppen. Want wiej mut de klimaatdoelen halen.

En wiej wilt ook gearne dat der heade is, woer’w lekker köant bootcampen in onze felroaze päks en te strakke bokses zodat iederene kan zeen dat et neudig is. Dus hakket wiej dee oarge Riesserboarg kaal, want dat lik toch zo mooi natuurlik. En oh ja, wiej mut de klimaatdoelen halen. Woer as eerst een mooi bos was, met heel wat CO2-slorpende beume, is noe ne teumige, trurige, kale strekke. Mer dee poar töskes liekt toch zo mooi hè, dee anderhalve wekke in augustus! Voort kö’j oaver dee vlakte mooi noar dee möllen kieken. Wat zal et der ook weeien, want der stoat gin beume mear um wind te vangen. Want wiej mut de klimaatdoelen halen. De eerste boarken doot der alwier öar beste, mer dee mochen wal meanen. Gauw ne kudde kaalvrettende sköape der op. Wat he’w noe an beume? Möllen wi’w zeen! Vort met den pröttel!

En dee beume an de Van Broekhuizenstroate en doar in dat achterofströatjen an de Hoar mut ook wieberen. Doar kump blad of. En um dat op te rumen mu’w wier dage met bladbloazers joesteren en dat kost benzine, dus krie’w mear oetstoot. Vort met dee dinge. Want wiej mut de klimaatdoelen halen.

Een bos vol beume biepotten op et olde RV-terrein? Of in de nieje natuur? Weast toch wiezer, dat leavert gin driete op. Windmöllen mu’w hebben! Non a’w et doaroaver eens zint; könt dee neet ’n betten grötter? Dan könt ze vanoet Moarkel ook es noar Riessen kieken en zeggen van: “Poah, watte knapen! Doar in Riessen, doar pakt ze nog es duur.” Tucker Tower? Wiej bouwt der wal tiene.

Dake van et industriegebeed volleggen met zunneplaten? Mu’j geheels neet oaver neumen. Want wiej mut de klimaatdoelen halen.

Wat ducht oe van ne lange riege kleine möllekes langs de Enterstroate? Doar pleart de windbulen van Riessen zo onwies vuurbie met dee grote ofzichtelike Amerikaanse hondehukke dat der et hele Opbrook lecht van kan kriegen.

Tuurlik, bezwoar maken mag. Leu magt op inloopoavende eaven bezorgd van zik of bieten. En mooie Facebook-groepkes oprichten. Dan meant de leu dat ze wat te vertellen hebt. Mer wiej mut de klimaatdoelen halen. Dus nikke wiej ne keer ernsthaftig as leu protesteert. Mer dee möllen dee komt der. Want wiej mut de klimaatdoelen halen. En dat kan eankel met monsterlike möllen.

Martin ter Denge

Meer berichten