Column: Jacuzzi

Jans van de Diele, hee woonden allenig, redden zich prima zoonder ofwaskemesiene, zoonder electrisch dekne, zoonder vloerverwarming, zoonder ne dreug-waskemesiene. Hee had ginnen strak angelegden hof met elektrisch en op ofstaand te bedenen iezern hekwoark. Hee had ginnen störtdouche of ne WC woer at ze oew met ne lauwwoarme waterstroale het gat skone speuln.

Jans was vermoedelijk een tevreaden man en dreunk um gezoond te bliewn elken dag nen borrel. Hee was doar op het Vaticaan de konink te rieke, van luxe had Jans nog nooit eheurd en hee missen het ook nit.

Regtevoort is det aanders. Viej hebt de wealte leef ekregen. Covid-19 of lockdowns hooldt oons nit tegen, iej koant jums aln deksel gewoon via ‘t internet kopen, de bezorgweeangtjes maakt zowat verskel wee at het eerste de stroate injag. Etten kö’j ook gewoon besteln; ze koomp het oe wal brengen. Ceanten zeent der te ballast, de beurzen doot het better as ooit.

De leste trend is det de leu een bubbelbad biej thoes weelt hebben. Nee, nit zo’n deenk ín ‘t bad in thoes, mear vuurboeten as een soort femilie-zitbad. Lekker Corona-vriej dichte tegen mekoar an in ‘t zwempäkn of nóg meender, een moondmasker op en mear genieten van 38 groad water um en oawer oe hen. Met ne ofstaandbediening kö’j de waterstroalen dan hätter of zachter zetten en iej knipt eawn met de vingers en ze zet der oe ook zo een goed getemperatuurd wit wientje oet de Elzas biej en een stukn camembert of gewone oolde keze. Het allermeuiste is um te zeggen ‘het vröar 8 groad vuurboeten en viej zatten gisteroawend nog fijn in oonzen Jacuzzi’. Dán doo’j met!

Dan deank ik dreks an de Diele en an Wim Ligterink. Ze zollen der van groezen um al det skone dreenkwater (4 moal per joar is zo tiendoezend liter) in det bad en wát ducht oe van al den stroom, want zo’n bad mut dag en nacht op precies 38 groad worden eheulden. Geewt mear eens acht: de meeste Jacuzzi-leu zegnt dreks ‘det kost mear 2,64 euro per dag an stroom, vaalt best met’.

Iej heurt de Jacuzzi-leu nit oawer het gevoar van legionella, oawer het gevoar van cellulitus, oawer het gevoar van Hepatitus A (kan zo gebuurn at een wich in de bokse dut en a’j per oongelukke det water duursloekt). Der zeent leu woervan a’j de klokke der liek op köant zetten det ze zo’n deenk weelt hebben. Dee hooldt van gadgets, teundelderieje zolle viej zeggen. Mear der zeent ook leu woer a’j het gewoon nit van verwocht. En dee appt oe dan in de weenterdag: ‘Viej zit hier lekker in het water te sputtern’.

Het is der biej hen!

Gerard Voortman

Meer berichten