Column: Aardbeien

In ‘Cornona-tieden’ wordt ondernemmers veendingrieke. Dekbedfabrikaanten begint moondkäpkes te maken, cafetaria’s doot net as det Pizza-volk an bezorgen en aarbei-kwekers maakt nen drive-in. Nit te geleuwen mear woar.

Viej wörden etipt um ne moal noar Maandervenne te jaangn, want doar hebt ze seends het begin van ‘Corona’ nen aarbei-drive in. Op de webstea netuurlijk mooie zinnen: “kom in een rustieke sfeer genieten in een traditionele omgeving”. Het goodkeupste reclamebureau zol het können bedeanken. Nittemin, ne mooie umgewing doar; een typisch Tweants coulissenlandschap op nen steenworp van Duutslaand en dán: bots zee’j in dee negerieje nen verkeersregelaar in een oranje hesje…!? Iej weet nit wa’j dan zeet. In een groot weailaand hebt ze zon paperclip-achtig greandte-parcour emaakt woer duur a’j precies köant zeent hoe völle auto’s nog vúúr oe zeent, terwiel at der zon vieftig waangs zeent met leu dee at nen beker ies weelt, yoghurt kan ook, vanzelf ook woafels en smoothies, mét of zoonder boerenslagroom. Heanig wier optrekken. At ’n paperclip stoomp vol steet, is de wochttied dikke twee uur. Vuur een hëandkevol aardbeien!!!

Jea! An de buurte. Een vreandelijk kearlke van good twentig neamp net as biej McDonalds de bestelling op, mear dan met ne penne en een skriefblok. Det dut’e dan gewoon vanoet een oetgezaagd raam van ne vuurmalige oolde voarkensschure, duchen miej. Dan wier heanig an het toch wal oart rommelige oarf op woe’j dan oetkomt biej ne mooie oawerkapping. Doar stoat dan een poar jonge vrouwleu nearig te woarken.

Eerst ofrekkenen. Det doot ze dan allenig met pin en het apparaatje op nen langen steln, allemoal ‘contactloos’ en mooi plat van dee jonge meaks achter de ‘teun’baanke. Het water löp oe zo heanig an um de taande hen, a’j zeet wat dee leu vúúr oe kriengt.

Jea! Wier an de buurte. Reamke lös en doar wör oe met nen steln met een zaandblik der an-eknupt, oewen beker met ies en aarbeien, oewe smoothies zó duur het autoreamke noar binnen hen eschöawen. 100 proceant RIVM-proof contactloos aardbeien kopen!

En dan mu’j oe mear redden, lik het wal. Lange noadeaken lukt oe nit want achter oe begint ze heanig an an te drukken en het ies begeent al te smeelten.
De meeste leu parkeert, bliewt zitten en doar stoat ze dan alleman nöast mekoar te genieten van een poar aardbeien. Viej jaggen een eandke wieter, zatten ’n auto in ne spikke van ‘n maïslaand. En dan mooie natuur, slikken in gloepens lekkere én gezoonde aardeien oet Maandervenne.
Veendingrieker kán zowat nit.

Gerard Voortman

Meer berichten
 
Auto zoeker