<SCRIPT SRC="//secure.adnxs.com/ttj?id=10195427&cb=[CACHEBUSTER]&referrer=hartvanalmelo.nl&pubclick=[INSERT_CLICK_TAG]&postcode=760,761,762" TYPE="text/javascript"></SCRIPT>
Foto: Petra Koenderink

Column: Baanken

Disse moal wil ik het hebben oawer de baanken in Riessen. Wesweage 'n technischen vuuroetgaank koomp gin meanske mear biej ne baanke. Aln deksel beeldbankieren of met de i-phone oewne baankzaakn doon.

Temet goat ze oe ook nog verteln dej mun betaaln vuur het feit det ze op oew geeld past. Het is de umgekeerde wearlnd. Det dee reante negatief wordt, lig nit an Maarten Otten of an Hans van 'n Breenks, ook nit an Kees van Dijkhuizen van de ABN en ook nit an Hamers van de ING. Al det gehannes met dee reante he'w te daanken an oons zelf en an de oawerheaid, en an Draghi van de Europese Centrale Baanke. Umdet de leu onzeker zeent, goat ze spoaren. Det geeld koomp nit in de economie, dus gin inflatie, dus dech det oerdomme ECB-volk um ongestraft dom verdan de reante te loaten zakken, want dán goat de leu geeld oetgewen. Kloarloeder onzin; mear iej brengt miej van 'n tekst. Ik wil het jums nit hebben oawer déé baanken mear oawer de baanken woer a'j op köant zitten.

An de Moesel um de 50 meter ne baanke, in Riessen op ne veerkaanten kilometer ne baanke. Tot vuur kort, want in Riessen hebt ze kortens tien extra baanken eplaatst. Ze hebt doar vermoedelijk een deur bureau biej ehad dee eerst nen houtskoolschets hef e-maakt en dan een verkennend vooronderzoek en dan een plan van aanpak. Kost zo 30.000 euro, mear dan he'j ook wat en is der good oawer noadach.
Riessen wol volgens een woordvoerder 'bankzaken' vanoet het sociale domein ouderen, méár baanken hebben vuur leu dee at te voot noar het centrum goat. Dan köant ze onderweg oetrösten. Ik vinde det klasse van de gemeente. Mear oawer de plaatste van ene baanke, kan ik nit biej.
Jaangt vuur de oardigheaid eens nen moal langs woninginrichter Jan Kuper op de Hoar en dreks leenks doarvan de veurwoarklooze van JeRosman. Doar hebt de kearls van de gemeentewerf ne baanke too e-zat. Iej lacht oew van de bene.

Tusken de gewone weg en de bedieningsweg op nen grösstreppel van good 2 meter breed, steet nen baanke met een gloepens froai oetzicht. Ofvalbäkke der biej ontbrekt, want dan wör het te deur.
'n Gemeentelijke woordvoerder gaf miej wal geliek. Het was nit de meest ideale stea, mear jea, op aandere plaatsen hadden ze van de buurte tegengas e-had, doarumme hadden ze vuur disse stea ekeuzen. En dee baanke steun ook mooi kort biej de halteplaatse van de Flexbusse.

Zee-j wal, zo dom zeent de baankleu nog nit.

Gerard Voortman


<SCRIPT SRC="//secure.adnxs.com/ttj?id=10195427&cb=[CACHEBUSTER]&referrer=hartvanalmelo.nl&pubclick=[INSERT_CLICK_TAG]&postcode=760,761,762" TYPE="text/javascript"></SCRIPT>
Meer berichten
 
Auto zoeker
<SCRIPT SRC="//secure.adnxs.com/ttj?id=10195440&size=160x600&promo_sizes=120x600&cb=[CACHEBUSTER]&promo_alignment=center&referrer=hartvanalmelo.nl&pubclick=[INSERT_CLICK_TAG]&postcode=760,761,762" TYPE="text/javascript"></SCRIPT>
<SCRIPT SRC="//secure.adnxs.com/ttj?id=10195428&cb=[CACHEBUSTER]&referrer=hartvanalmelo.nl&pubclick=[INSERT_CLICK_TAG]&postcode=760,761,762" TYPE="text/javascript"></SCRIPT>