<SCRIPT SRC="//secure.adnxs.com/ttj?id=10195427&cb=[CACHEBUSTER]&referrer=hartvanalmelo.nl&pubclick=[INSERT_CLICK_TAG]&postcode=760,761,762" TYPE="text/javascript"></SCRIPT>
Foto: Petra Koenderink

Autolozen zöandag

Viej goat met oe een kleain eandke terugge op 'n kalender en benaamd noar de tied van 'n ölliecrisis in 1973. Vanweage oonze pro-Israëlische hoolding dreejn toen een poar öllielaanden 'n kraan dichte. Um het öllie en benzineverbroek tegen te goan, steeln de toenmalige oawerheaid oonder leaiding van 'n leenksen Joop den Uyl een antal autoloze zöandage in.

Wat ne wealte, één dag in de wekke gin gejakkerte met auto's behooldens zeeknwaangs, de brandweer en de politie en nog een poar oetzeunderingen. Alleman lopend of ene den at oart wieter vot wonen, met de fietse noar de koarke . Benaamd ook nog eens heel good vuur 't lief en de conditie. Al gauw kömmen der oetzeunderingen, netuurlijk, a-j noar de koarke weelt en gin been te skoare koant zetten, vroag iej ontheffing, doar is niks mis met.

Loat het nog eens good op oe inwoarken. Preenspoal gin auto's op zonnen autolozen zöandag, wat ne weldaad. Ik kriege netuurlijke het verwiet det ik nit van dissen tied zirre en det miej eens vuur de plette mut veuln. Det begriep ik wal.

Nit votgoan hen visiten, gewoon noa koarktied op 't hoes an en de zommerdag angenaam vuurboeten zitten, een book te leazen, oet rösten, een betjen mediteren, ne komme thee en een sukelaatje of nen haande vol aapnötjes. Net as 'n Toef van de Hatteweg den at dan zöandaangs al aapnötjes ettend noar zin doewnkameroad Hendrik van Kapdieks leup.
Wat zol de mensheaid der good met of wean um wier nen dag of te zeundern van aandere dage en 'n eersten dag van de wekke, wier as röstdag in te stellen. Dan wil ik het nog al geet nit hebben oawer det de weenkels wier dichte mun op zöandag want det zeent ook heel völle leu met miej eens det det puur slecht is vuur 'n meanske en het gin kwartje méár opsmit. Een meanske mut zik mangs gewoon röste gunnen.
Der goat in verbaand met het stikstofprobleem wíer stemmen op um nen autolozen zöandag in te voeren, en alle vrachtwagens biej de dure.
Ik deanke det ook in 'oonze' kringen het nen hoop leu met miej eens zöalt wean. Mear ook nen hoop leu absoluut nit. Leu dee at bevuurbeeld op nen steenworp ofstaand van de koarke of-wont en met de luxe wage noar de koarke racet.

Zó völle auto's op zöandag biej 't Noordn det ze zelfs oranje-hesjes-dreagende perkeerwachters hebt bedacht um al dee auto's in goo banen te leaiden. Opeltjes biej Opeltjes, Volvo's biej Volvo's en Golfjes biej Golfjes, op de centimeter secuur.
Hej non ooit zo zoolt egetten.
Dreks wier invoeren den autolozen zöandag!

Gerard Voortman


<SCRIPT SRC="//secure.adnxs.com/ttj?id=10195427&cb=[CACHEBUSTER]&referrer=hartvanalmelo.nl&pubclick=[INSERT_CLICK_TAG]&postcode=760,761,762" TYPE="text/javascript"></SCRIPT>
Meer berichten
 
Auto zoeker
<SCRIPT SRC="//secure.adnxs.com/ttj?id=10195440&size=160x600&promo_sizes=120x600&cb=[CACHEBUSTER]&promo_alignment=center&referrer=hartvanalmelo.nl&pubclick=[INSERT_CLICK_TAG]&postcode=760,761,762" TYPE="text/javascript"></SCRIPT>
<SCRIPT SRC="//secure.adnxs.com/ttj?id=10195428&cb=[CACHEBUSTER]&referrer=hartvanalmelo.nl&pubclick=[INSERT_CLICK_TAG]&postcode=760,761,762" TYPE="text/javascript"></SCRIPT>